Shu kunlarda so‘z mulkining sultoni, buyuk mutafakkir Alisher Navoiy tavalludining 583 yilligi hamda shoh va shoir Zahiriddin Muhammad Bobur tavalludining 541 yilligi keng nishonlanmoqda.  

     Chirchiq davlat pedagogika universitetida o‘tkazilgan ma’naviy-ma’rifiy tadbir ham Alisher Navoiy hayoti va ijodiga bag‘ishlandi. 

     Tadbirda Chirchiq davlat pedagogika universiteti rektori G‘ofurjon Muxamedov, Chirchiq shahar hokimi Davron Xidoyatov, O‘zbekiston xalq shoiri Mahmud Toirov (Mahmud Toir), universitet talabalari hamda professor-o‘qituvchilari ishtirok etdi. 

     "Hazrat Alisher Navoiyning asarlari butun insoniyat uchun buyuk ilm manbai, ulkan dasturul amaldir. Navoiy ijodi hozirgi kunda ham dolzarb bo‘lib, yoshlarga hayot haqiqatlarini anglashga, nozik insoniy tuyg‘ularni tushunishga ko‘maklashmoqda", dedi universitet rektori G‘ofurjon Muxamedov.

     Tadbirda mutafakkirning boy ma’naviy merosi, hayoti va ijodi haqida ma’lumotlar hamda g‘azallarining ilmiy talqini ishtirokchilar e’tiboriga etkazildi. 

     Talabalar Alisher Navoiy qalamiga mansub g‘azal va ruboiylardan parchalar mutolaa qildi. Buyuk shoir g‘azallari asosida yaratilgan kuy-qo‘shiqlar kuylandi.