Tillar:       O'z       En       Ру    

Normativ xujjatlar

Hujjat nomi: Xorijda 5ta yо‘nalish bо‘yicha mutaxassislar tayyorlanadi - Prezident qarori

Saytga qo'yilgan: 10 04 2019


Mazmuni

/ Toshkent viloyati Chirchiq davlat pedagogika instituti. / Ташкентская область Чирчикский педагогический институт / Chirchiq State Pedagogical Institute of Tashkent region.  /  /  /  /   /

О‘zbekiston Respublikasi Prezidenti Shavkat Mirziyoyevning ta’lim sohasidagi navbatdagi qarori imzolandi. Hujjat matni О‘zAda keltirilgan.

Qaror xorijdagi yetakchi universitetlar, ilmiy markazlar va boshqa tashkilotlarda kadrlarni tayyorlash, malakasini oshirish va stajirovkadan о‘tkazish tizimini yanada takomillashtirish, ijtimoiy soha, davlat boshqaruvi va iqtisodiyot ustuvor tarmoqlarining yuqori malakali mutaxassislarga bо‘lgan о‘sib borayotgan ehtiyojlarini qondirish uchun zarur shart-sharoitlarni yaratish, shuningdek, О‘zbekiston Respublikasi Vazirlar Mahkamasi huzuridagi Mutaxassislarni xorijda tayyorlash va vatandoshlar bilan muloqot qilish bо‘yicha «El-yurt umidi» jamg‘armasi faoliyatini samarali tashkil etish maqsadida qabul qilingan.

Hujjatga kо‘ra, kadrlarni tayyorlash, malakasini oshirish va stajirovkadan о‘tkazish uchun nomzodlarni tanlov asosida saralab olish vazirliklar va idoralarning maqsadli buyurtmalari asosida Jamg‘arma mablag‘lari (Jamg‘arma stipendiyalari) hisobidan quyidagi yо‘nalishlar bо‘yicha amalga oshiriladi:
ta’lim; 
fan va ilmiy tadqiqotlar; 
sog‘liqni saqlash; 
davlat boshqaruvi; 
iqtisodiyotning istiqbolli tarmoqlari. 

2019-2021 yillarda Jamg‘arma stipendiyalari hisobidan kadrlarni tayyorlash, malakasini oshirish va stajirovkadan о‘tkazish dasturlari bо‘yicha о‘qishga yuboriladigan kadrlarning prognoz miqdori 3-ilovaga muvofiq 4 000 о‘rindan kam bо‘lmagan miqdorda, Jamg‘arma stipendiyalariga ajratilgan umumiy о‘rinlarning 20 foizidan kam bо‘lmagan miqdorini magistratura va doktoranturada о‘qish uchun ajratilishi ma’qullangan.

Vazirliklar va idoralar har yili 1 avgustga qadar jamg‘arma dasturlari bо‘yicha xorijdagi yetakchi universitetlar, ilmiy markazlar va boshqa tashkilotlarda kadrlarni tayyorlash, malakasini oshirish va stajirovkadan о‘tkazishga buyurtmalar portfelini shakllantiradi, shuningdek, kadrlarni tayyorlash, malakasini oshirish va stajirovkadan о‘tkazishning ustuvor yо‘nalishlari va mutaxassisliklar bо‘yicha takliflarni Jamg‘armaga kiritadi, shuningdek, eng yaxshi tayyorlangan nomzodlarni Jamg‘armaning tanlovida ishtirok etishlari uchun tavsiya qiladi.

Jamg‘armaning Vasiylik kengashi Jamg‘arma stipendiyalarini olish uchun yо‘nalishlar bо‘yicha nomzodlarni tanlov asosida saralab olish yuzasidan kadrlarni tayyorlash, malakasini oshirish va stajirovkadan о‘tkazishning ustuvor mutaxassisliklarini tasdiqlaydi, nomzodlarni tanlov asosida saralab olishning tegishli darajasi va sifatini ta’minlash maqsadida tanlov yо‘nalishlari bо‘yicha ajratilgan о‘rinlarni qayta taqsimlash bо‘yicha qarorlar qabul qiladi. 

Jamg‘armaning Vasiylik kengashiga: 

- kо‘zda tutilgan limitlar doirasida Jamg‘arma stipendiyalari yо‘nalishlari bо‘yicha о‘rnatilgan tartibda qо‘shimcha tanlovlarni e’lon qilishga; 

- alohida vazirlik va idoralar xodimlari kasbiy faoliyatining zarurati hamda о‘ziga xos jihatlaridan kelib chiqqan holda Jamg‘arma stipendiyalariga nomzodlarni tanlov asosida saralab olish yо‘nalishlariga о‘zgartirishlar kiritishga; 

- xalqaro tan olingan tashkilotlar reytingiga kо‘ra jahondagi eng yaxshi 500 talik yoki tanlangan fan yо‘nalishi bо‘yicha eng yaxshi 200 talik rо‘yxatiga kirgan xorijiy ta’lim muassasalari va ilmiy markazlarning magistraturasi yoki doktoranturasiga mustaqil tarzda kirgan va ta’lim olayotgan О‘zbekiston Respublikasining fuqarolariga Jamg‘arma stipendiyalarini ajratish bо‘yicha qarorlar qabul qilishga; 

- Jamg‘arma xarajatlari parametrlarida xorijiy hamda mahalliy ta’lim va ilmiy muassasalari bilan birgalikda tashkil etiladigan ta’lim va tadqiqot loyihalarini, shu jumladan, Jamg‘arma stipendiyalariga nomzodlarni xorijiy tillarga о‘qitish dasturlarini moliyalashtirish uchun zarur mablag‘larni kо‘zda tutishga ruxsat berilgan.

Vazirlik va idoralar ikki hafta muddatda 2019 yil uchun ajratilgan о‘rinlardan kelib chiqib, xorijda kadrlarni tayyorlash, malakasini oshirish va stajirovkadan о‘tkazishning ustuvor yо‘nalishlari va mutaxassisliklari bо‘yicha asoslangan takliflarni Jamg‘armaga taqdim etadi. 

Jamg‘arma Vasiylik kengashi ikki oy muddatda Bir nomzodga ajratiladigan Jamg‘arma stipendiyasining chegaraviy о‘lchami va moliyalashtirish tartibini belgilash tо‘g‘risidagi nizomni ishlab chiqadi va tasdiqlaydi. 

О‘zbekiston Respublikasi Oliy va о‘rta maxsus ta’lim vazirligi Jamg‘arma, О‘zbekiston Respublikasi Prezidenti huzuridagi Davlat boshqaruvi akademiyasi va О‘zbekiston Respublikasi Tashqi ishlar vazirligi bilan birgalikda 2019 yilning 1 martiga qadar Jamg‘arma stipendiyalarini olishga nomzodlarni, ayniqsa, respublika hududlarida xorijiy tillarga о‘qitishning maxsus dasturlarini ishlab chiqadi. 2019 yilning 1 aprelidan boshlab Jamg‘arma stipendiyalarini olishga nomzodlarni xorijiy tillarga (ingliz, nemis, fransuz va boshqalar) о‘qitish maxsus dasturlari asosida maqsadli kurslarni tashkil etish choralarini kо‘radi.

О‘zbekiston Respublikasi Tiklanish va taraqqiyot jamg‘armasi 2019 yilda Jamg‘arma dasturlari bо‘yicha xorijda kadrlarni tayyorlash, malakasini oshirish va stajirovkadan о‘tkazishni moliyalashtirish uchun 3 million AQSH dollari miqdorida mablag‘ ajratadi, Jamg‘armaning asoslangan talabnomalari bо‘yicha xorijda kadrlarni tayyorlash, malakasini oshirish va stajirovkadan о‘tkazish xarajatlarini moliyalashtirishni ta’minlaydi.

О‘zbekiston Respublikasi Investitsiyalar bо‘yicha davlat qо‘mitasi О‘zbekiston Respublikasi nomidan tuziladigan investitsion bitimlarga investorlarning investitsiyalari obyekti bо‘lgan tashkilotlar uchun xorijda kadrlarni (mutaxassislarni), shu jumladan, Jamg‘armaning ta’lim dasturlari bо‘yicha о‘qitish yо‘li bilan tayyorlash, malakasini oshirish va stajirovkadan о‘tkazishni moliyalashtirish bо‘yicha majburiyatlari kiritilishini amaliyotga tatbiq etadi, Jamg‘arma hamda manfaatdor vazirlik va idoralar bilan birgalikda ikki oy muddatda Jamg‘arma dasturlari doirasida xorijda kadrlarni tayyorlash, malakasini oshirish va stajirovkadan о‘tkazishni moliyalashtirish uchun xalqaro moliya institutlari va xorijiy hukumat moliyaviy tashkilotlarining uzoq muddatli grant mablag‘larini jalb etish masalasini ishlab chiqadi va natijalari bо‘yicha О‘zbekiston Respublikasi Vazirlar Mahkamasiga asoslangan takliflarni kiritadi. 

Jamg‘arma xorijda ta’lim oladigan stipendiatlarning dastlabki miqdorini aniqlab, kadrlarni tayyorlash, malakasini oshirish va stajirovkadan о‘tkazish yо‘nalishlari va mutaxassisliklari bо‘yicha aniq takliflarni bir oy muddatda О‘zbekiston Respublikasi Tashqi ishlar vazirligiga kiritishi belgilangan.

О‘zbekiston Respublikasi Tashqi ishlar vazirligi О‘zbekiston Respublikasining xorijdagi diplomatik vakolatxonalari va konsullik muassasalari bilan birgalikda Jamg‘armaga quyidagi masalalar yuzasidan kо‘mak berilishini ta’minlaydi:
- xalqaro tashkilotlar, xorijiy mamlakatlar davlat tuzilmalari va nodavlat tashkilotlari bilan aloqa о‘rnatish hamda ularni kadrlarni tayyorlash, malakasini oshirish va stajirovkadan о‘tkazish bо‘yicha loyihalarni amalga oshirishga jalb qilish;
- respublika mutaxassislarini xorijdagi yetakchi universitetlar, ilmiy markazlar va boshqa tashkilotlarda tayyorlash, malakasini oshirish va stajirovkadan о‘tkazishga yuborish;
- hamkorlar izlash hamda Jamg‘arma stipendiatlarini о‘qitish uchun xorijiy mamlakatlar yetakchi universitetlari va ilmiy markazlari bilan hamkorlik tо‘g‘risida tegishli bitimlarni tuzish;
- bir yilda kamida ikki marta О‘zbekiston Respublikasining xorijdagi diplomatik vakolatxonalari va konsullik muassasalari ishtirokida Jamg‘arma dasturlari bо‘yicha kadrlarni tayyorlash, malakasini oshirish va stajirovkadan о‘tkazishni tashkillashtirish masalalarini muhokama qilish uchun videoselektor yig‘ilishini о‘tkazish. 

Vazirliklar va idoralar bir oy muddatda О‘zbekiston Respublikasi Tashqi ishlar vazirligi va Jamg‘armaga:
- mamlakatda amalga oshirilayotgan islohotlarni amalga oshirishga yetakchi xorijiy ekspertlar, shu jumladan, chet elda yashaydigan vatandoshlarni jalb etish hamda ularning salohiyatidan foydalanish masalalarini ishlab chiqish uchun iqtisodiyot tarmoqlari va sohalari bо‘yicha talab etiladigan mutaxassisliklar rо‘yxatini;
- ilgari tegishli vazirliklar va idoralarning markaziy apparatlari va tarkibiy bо‘linmalarida ishlagan, hozirda chet elga chiqib ketgan yuqori malakali mutaxassislar rо‘yxatini kiritadi. 

Jamg‘arma manfaatdor vazirlik va idoralar bilan birgalikda bir oy muddatda qonun hujjatlariga ushbu qarordan kelib chiqadigan о‘zgartirish va qо‘shimchalar tо‘g‘risida О‘zbekiston Respublikasi Vazirlar Mahkamasiga takliflar kiritadi.

Institutda yuz berayotgan yangiliklarni elektron pochtangizga yuborilishini istaysizmi?

Quyidagi oynada siz o'z email-pochtangizni faollashtirsangiz, har bir yangilik pochtangizga yuboriladi.